తెలంగాణలో భారీగా ఐఏఎస్ అధికారుల బదిలీలు.. 13 మందికి స్థానచలనం

తెలంగాణ ప్రభుత్వం రాష్ట్ర పరిపాలనలో కీలక మార్పులు చేపట్టింది. ఈ మేరకు భారీ స్థాయిలో 13 మంది ఐఏఎస్ అధికారులను బదిలీ చేస్తూ శనివారం ఉత్తర్వులు జారీ చేసింది. హైదరాబాద్ జిల్లా కలెక్టర్‌గా పనిచేస్తున్న దాసరి హరిచందన సహా పలువురు సీనియర్ అధికారులు, జిల్లా కలెక్టర్లకు కొత్త బాధ్యతలు అప్పగించింది. ప్రభుత్వ ప్రధాన కార్యదర్శి కె. రామకృష్ణారావు గవర్నర్ పేరుతో ఈ ఉత్తర్వులు జారీ చేశారు.

ప్రస్తుతం పంచాయతీరాజ్, గ్రామీణాభివృద్ధి శాఖ ప్రత్యేక ప్రధాన కార్యదర్శిగా ఉన్న సీనియర్ ఐఏఎస్ అధికారి సంజయ్ కుమార్ (1995 బ్యాచ్)ను ఢిల్లీలోని తెలంగాణ భవన్ స్పెషల్ ఆఫీసర్‌గా బదిలీ చేశారు. కార్మిక, ఉపాధి కల్పన శాఖ ప్రత్యేక ప్రధాన కార్యదర్శిగా ఉన్న ఎం. దాన కిషోర్ (1996 బ్యాచ్)ను సంజయ్ కుమార్ స్థానంలో పంచాయతీరాజ్, గ్రామీణాభివృద్ధి, గ్రామీణ నీటి సరఫరా శాఖ ప్రత్యేక ప్రధాన కార్యదర్శిగా నియమించారు. గవర్నర్ ప్రత్యేక ప్రధాన కార్యదర్శిగా దాన కిశోర్ పూర్తి అదనపు బాధ్యతల్లో కొనసాగుతారు.

ఈ బదిలీల్లో హైదరాబాద్ కలెక్టర్ దాసరి హరిచందన (2010 బ్యాచ్) బదిలీ ప్రధానంగా నిలిచింది. ఆమెను కార్మిక, ఉపాధి కల్పన శాఖ కార్యదర్శిగా నియమించారు. దీంతో పాటు రెవెన్యూ (విపత్తుల నిర్వహణ) శాఖ కార్యదర్శిగా కూడా ఆమెకు పూర్తి అదనపు బాధ్యతలు అప్పగించారు.

మరోవైపు ఖమ్మం కలెక్టర్ అనుదీప్ దురిశెట్టి (2018 బ్యాచ్)ని ఐటీ శాఖ జాయింట్ సెక్రటరీగా బదిలీ చేసి, గనులు మరియు భూగర్భ వనరుల శాఖ డైరెక్టర్‌గా, తెలంగాణ మినరల్ డెవలప్‌మెంట్ కార్పొరేషన్ (TGMDC) వీసీ & ఎండీగా పూర్తి అదనపు బాధ్యతలు ఇచ్చారు. 

సంగారెడ్డి కలెక్టర్ పి. ప్రవీణ్య (2016 బ్యాచ్)ను రవాణా, రోడ్లు భవనాల శాఖ స్పెషల్ సెక్రటరీగా, నిర్మల్ కలెక్టర్ అభిలాష అభినవ్ (2018 బ్యాచ్)ను ఇంటర్మీడియట్ ఎడ్యుకేషన్ డైరెక్టర్, ఇంటర్ బోర్డు సెక్రటరీగా నియమించారు.

ఇతర ముఖ్యమైన బదిలీలలో, పౌరసరఫరాల శాఖ డైరెక్టర్ జెండాగే హనుమంత్ కొండిబ (2016 బ్యాచ్)ను ఆరోగ్యశ్రీ హెల్త్ కేర్ ట్రస్ట్ సీఈఓగా బదిలీ చేశారు. ఇంటర్మీడియట్ ఎడ్యుకేషన్ డైరెక్టర్‌గా ఉన్న కృష్ణ ఆదిత్య (2014 బ్యాచ్)ను పరిశ్రమలు, వాణిజ్య శాఖ ప్రత్యేక కార్యదర్శిగా నియమించారు. గిరిజన సంక్షేమ శాఖ డైరెక్టర్ బి.ఎం. సంతోష్ (2017 బ్యాచ్)ను అదే శాఖ స్పెషల్ సెక్రటరీగా నియమించి, డైరెక్టర్‌గా పూర్తి అదనపు బాధ్యతల్లో కొనసాగేలా ఆదేశించారు. 

ఈ మార్పులతో పరిపాలనను మరింత గాడిలో పెట్టాలని ప్రభుత్వం భావిస్తున్నట్లు తెలుస్తోంది. మిగిలిన అధికారులకు కూడా వివిధ శాఖల్లో కీలక బాధ్యతలు అప్పగించారు.

క్ర.సం.	పేరు	బ్యాచ్	పాత హోదా	కొత్త హోదా	అదనపు బాధ్యతలు (FAC)
1	సంజయ్ కుమార్	1995	స్పెషల్ చీఫ్ సెక్రటరీ, PR&RD	స్పెషల్ ఆఫీసర్, తెలంగాణ భవన్, న్యూఢిల్లీ	—
2	ఎం. దాన కిషోర్	1996	స్పెషల్ చీఫ్ సెక్రటరీ, LET&F	స్పెషల్ చీఫ్ సెక్రటరీ, PR&RD	గవర్నర్ స్పెషల్ చీఫ్ సెక్రటరీగా కొనసాగింపు
3	బి. విజీంద్ర	2006	సెక్రటరీ, TGSWREIS & కమిషనర్, SCD	సెక్రటరీ, SCD డిపార్ట్‌మెంట్	సెక్రటరీ, TGSWREIS & కమిషనర్, SCD
4	హరిచందన దాసరి	2010	కలెక్టర్ & జిల్లా మేజిస్ట్రేట్, హైదరాబాద్	సెక్రటరీ, LET&F	సెక్రటరీ, రెవెన్యూ (DM)
5	కృష్ణ ఆదిత్య ఎస్	2014	డైరెక్టర్, ఇంటర్మీడియట్ ఎడ్యుకేషన్	స్పెషల్ సెక్రటరీ, పరిశ్రమలు & వాణిజ్యం	—
6	జెండాగే హనుమంత్ కొండిబ	2016	డైరెక్టర్, సివిల్ సప్లయిస్	సీఈవో, ఆరోగ్యశ్రీ హెల్త్ కేర్ ట్రస్ట్	స్పెషల్ సెక్రటరీ, PE డిపార్ట్‌మెంట్
7	పి. ప్రవిణ్య	2016	కలెక్టర్ & జిల్లా మేజిస్ట్రేట్, సంగారెడ్డి	స్పెషల్ సెక్రటరీ, R&B (TR&B)	—
8	సంతోష్ బి.ఎం.	2017	డైరెక్టర్, గిరిజన సంక్షేమం	స్పెషల్ సెక్రటరీ, గిరిజన సంక్షేమం	డైరెక్టర్, గిరిజన సంక్షేమం
9	అనుదీప్ దురిశెట్టి	2018	కలెక్టర్ & జిల్లా మేజిస్ట్రేట్, ఖమ్మం	జాయింట్ సెక్రటరీ, ITE&C	డైరెక్టర్, మైన్స్ & జియాలజీ, వీసీ & ఎండీ, TGMDC
10	అభిలాష అభినవ్	2018	కలెక్టర్ & జిల్లా మేజిస్ట్రేట్, నిర్మల్	డైరెక్టర్, ఇంటర్మీడియట్ ఎడ్యుకేషన్ & సెక్రటరీ, BIE	—
11	జి.వి. శ్యామ్ ప్రసాద్ లాల్	2019	అదనపు కలెక్టర్ (స్థానిక సంస్థలు), నాగర్‌కర్నూల్	డైరెక్టర్, సివిల్ సప్లయిస్	—
12	జి. ముకుంద రెడ్డి	2019	జోనల్ కమిషనర్, GHMC (గోల్కొండ)	స్పెషల్ కమిషనర్, I&PR, ఈవో స్పెషల్ సెక్రటరీ, GA (I&PR)	—
13	అపూర్వ్ చౌహాన్	2020	జోనల్ కమిషనర్, GHMC (కూకట్‌పల్లి)	ప్రాజెక్ట్ డైరెక్టర్ (CMRO), ప్రాజెక్ట్ O/o CCLA	—